Netbal

2009 - Weereens 'n jaar vol suksesse en hoogtepunte!

Nico Malan se twaalf netbalspanne het almal goed gevaar in die seisoen. Die hoogtepunte was toe omtrent al die interskole-wedstryde gewen is. Dankie aan al die dogters en hulle afrigters vir hulle lojaliteit en toewyding.

Vir die eerste span skop die seisoen reeds vroeg in Februarie af en teen middel Maart moes hulle alreeds hulle staal teen ander spanne begin wys. Hulle wen tydens Gill en Despatch se Sportfeeste onderskeidelik al 12 hulle wedstryde. Tydens die April-vakansie neem hulle deel aan die Top Netbaltoernooi vir o/19's en eindig sewende uit 20 skole. Ten spyte van twee beserings wys dié span karakter. Hulle speel altesaam 44 wedstryde waarvan hulle slegs 14 verloor en 1 gelykop speel.

Hoogtepunte tydens die seisoen:
- Wen die eerste FNB Classic Clashes teen Framesby in 'n spannende wedstryd 17 - 16.
- Neem deel aan die o/19 Nasionale Netbalfees vir die Top o/19-skole in die land, maar die toernooi word ontwrig deur gure weer met geen finale uitslag nie.
- Wen interskole teen D.F. Malherbe 28 - 10.

Aan die speelsters wil mej. Nel dankie sê vir hulle harde werk, die toewyding en karakter wat hulle regdeur die seisoen gewys het. Dankie ook aan die ouers en die Nico Malanners vir hulle getroue ondersteuning en belangstelling deur die seisoen.

Baie geluk aan die volgende 12 speelsters wat die Oos-Kaap verteenwoordig het: Tenicke Bezuidenhout, Nicola Botha en Natasha van Wyk (o/14); Tanri Strydom (o/15); Lize du Plessis (o/16); Susan du Plessis, Muki Gumede, Lwanda Ketse, Sharoné Lewis en Gabi Tidbury (o/17); Sabina Michau en Careshia Steenkamp (o/19).

Ons wil ook van hierdie geleentheid gebruik maak om al ons borge wat by een of ander span betrokke was, te bedank vir hulle finansiële hulp en betrokkenheid - dit word opreg waardeer.

Organiseerder: S.P. Nortjé