Toneel

Drie toneelgroepe van Nico Malan se toneelgeselskap het vanjaar stukke op die planke gebring en vele intriges opgelos.

In die paleis van Roosfontein verloop sake nie sonder slag of stoot nie. Die statige Koningin Rosie (Janka Lötter) sukkel om die verstrooide Koning Doring (Joubert Maarschalk) in Doringrosie van Roosfontein uit haar skoene te hou. Tydens die doopseremonie is Ta'Matie (Marcelle Versteeg) nie veel van 'n kinderoppasser nie, maar sorg vir ligte oomblikke. Die hofmeester (Junior Mentz) en hofknaap (Luané Vermaak) het probleme met die twee feë (Charné Ferreira en Shirley Louise du Plessis) wat al die ander feë "wat feeskriklik met feenansies gelol het", moet verteenwoordig. As Bilhartzia, die Slegte Fee (Marcia Boyens) opdaag, spreek sy haar doodswens uit ...

Gelukkig is Amnesia, die Goeie Fee (Sonika van Mollendorf) altyd laat en kan sy die wens in 'n lang slaap verander. Bilhartzia vermom haar as 'n man en op Doringrosie (Juanda Hills) se 16de verjaardag gebeur die onvermydelike. Terwyl die paleis lê en slaap, word die twee Weeluise (Mariné Nel en Ann Wait) oud en vet omdat niemand hulle rondjaag nie! En, soos in die sprokie, kom red Prins Disselblom (Markus Beukes) die paleis uit sy rustyd met 'n soen ... en hulle het vir ewig gelukkig gewoon!

In 'n Les oor di Tier sukkel Meester (Careshia Steenkamp) hom gedaan om sy stoute boel skoliere iets in die kop te kry. Dié groep seuns met al hulle stoutighede is tot groot vermaak van die gehoor vertolk deur gr. 11- en 12-meisies: Cara Rademeyer, Susan Olivier, Ilana Vorster, Daph-Marie Theron, Jani Steenkamp, Merelda Snyman, Alizma van Molendorff, Miecké Wessels, Siné du Preez, Suné Conradie, Tammy Greyvenstein, Susan du Plessis, Ruchelle Kleyn en Melissa Oosthuizen. As Gert se pa (Lourens Fourie) Meester wil kom aanval omdat hy sy kind slaan, red dié skoliere vir Meester en hulle kry "'n holiday" as beloning!

In Johanna O Johannes oorreed Jonnie (Adriaan Erasmus) se ouma, mev. Boshoff (Jolene Büchner), sy pa, Gabriël (Hendri Wait), om hom Johanna Petronella Boshoff te doop omdat sy geen kleinkind het wat na haar vernoem is nie. As Jonnie dan universiteit toe gaan, beland hy in Kanferfoelie, 'n dameskoshuis, saam met Letitia (Esther van der Walt) en Emma (Rona Meyer). Mev. Kruger (Vasti Botma) roep die administrasie se hulp in en Petrus (Jacques Morgan), 'n administratiewe assistent, word uitgestuur. Voordat hy nog 'n oplossing kon vind, het Letitia en Emma 'n meesterlike plan bedink wat ook sommer daartoe lei dat Jonnie uiteindelik Johannes Petrus gaan heet. Corrie (Heynrich du Toit) het 'n nuwe "kamermaat", 'n vroulike Jacobus Gerhardus Janse van Rensburg (Leta Meyer), wat verkeerdelik in Huis Malherbe geplaas is - en dit is dan ook die administratiewe assistent se oplossing vir die saak ... maar wil Jonnie regtig plekke ruil?

Die volgende vyf leerders ontvang toneelbalkies vir drie jaar se toneelspel: Marcia Boyens, Heynrich du Toit, Adriaan Erasmus, Janka Lötter en Junior Mentz.

Verantwoordelike opvoeder: H. Loubser